Элӗк районӗнчи Шор-Пайраш ялӗнче ҫуралнӑ Лидия Тимофеева 100 ҫулхи юбилейне паллӑ тунӑ. Хальхи вӑхӑтра вӑл Муркаш округӗнчи Шомикри интернатра пурӑнать.
Лидия Тимофеевнӑн ӗҫ стажӗ – 55 ҫул. Вӑрҫӑ пуҫланнӑ чухне вӑл 14-ра пулнӑ. Аслисемпе тан колхозра сухаланӑ, тыр-пул пухса кӗртнӗ, каҫсерен вара салтаксем валли посылкӑсем хатӗрленӗ.
17 сул тултарсан ӑна Иваново облаҫне торф кӑларма янӑ. «Чӑваш хӗрӗсен резин атӑ та пулман, ҫӑпатапа ҫӳренӗ», - аса илет вӑл. Окоп чавнӑ ҫӗре те хутшӑннӑ вӑл. Торф кӑларнӑ ҫӗрте 11 ҫул тӑрӑшнӑ.
Ҫак ҫула ҫитсен та Лидия Тимофеевна таса ӑспа ҫӳрет, хаваслӑ пулма тӑрӑшать.
Андрей Малаховӑн телекӑларӑмне чӑваш фермерне йыхравланӑ.
Ҫӗршыври паллаӑ телеертӳҫӗ Андрей Малахов ертсе пыракан «Привет, Андрей!» кӑларӑмне ентешӗмӗре чӗннӗ. Ҫав ҫын Элӗк муниципаллӑ округӗнчи Кирилл Степанов фермер.
Шоуна «Россия 1» (чӑв. Раҫҫей 1) каналпа кӑтартаҫҫӗ.
Чӑваш каччи телешоун черетлӗ кӑларӑмӑн хӑни пулӗ. Вӑл ӳкерӗннӗ передачӑна ҫу уйӑхӗн 2-мӗшӗнче эфира кӑларӗҫ.
Ялта ӳснӗ Кирилл ачаранпах ял хуҫӑлӑхӗпе кӑсӑкланнӑ. Малтан мускус кӑвакал ӗрчетсе пӑхнӑ, кайран хуҫалӑха пысӑклатса пынӑ. Степановсен картишӗнче паян 100 ытла ӑратлӑ выльӑхпа кайӑк-кӗшӗк, ҫав шутра павлинпа страус та пур. Унсӑр пуҫне пахчаҫимӗҫ тата тӗрлӗ чечек ӳстереҫҫӗ.
«Юрлама эпӗ пӗлместӗп, анчах Андрей валли парне хатӗрлерӗм. Мӗнле парне хатӗрленине сирӗн курмаллах», — тесе ҫырнӑ Кирилл хӑйӗн блогӗнче.
Йӗпреҫ оокругӗнчи Молния поселокӗнче ейӳ сарӑлнине пула ҫула татма тивнӗ.
Ака уйӑхӗн 3-мӗшӗнче поселок ҫывӑхӗнче ейӳ шывӗ тӑрук хӑпарнӑ. Ҫавна май пысӑк территори шыва каяс хӑрушлӑх сиксе тухнӑ. Ҫакна шута илсе вырӑнти влаҫ поселока илсе ҫитерекен ҫулӑн пӗр пайне татма йышӑннӑ – унтан ейӳ шывӗ юхӗ.
Ҫапла майпа территорие шыв илес хӑрушлӑх пӗтнӗ. Ҫул-йӗр ӗҫченӗсем ҫула каялла тума тытӑннӑ ӗнтӗ.
Сӑмах май, паян ирхине кун пек пӑтӑрмах Элӗк округӗнчи Мӑн Вылӑ ялӗнче те пулнӑ. Унта кӗпер ҫинчи ҫулӑн пӗр пайне ейӳ шывӗ илнӗ. Ялта вара 158 ҫын пурӑнать.
Элӗк районӗнчи Илленушкӑнь ялӗнче пурӑнакан 51 ҫулти арҫын арӑмӗн ачине хӗнесе пурӑннӑ. Хале ун тӗлӗшпе РФ Следстви комитечӗн Чӑваш Енри управленийӗн тӗпчевҫисем РФ Пуҫиле кодексӑн 117-меш стайин 2-мӗш пайӗн «г» пункчӗпе пуҫиле ӗҫ пуҫарнӑ.
2024 ҫулхи кӗркуннерен пуҫласа 2025 ҫулхи кӗркуннеччен ҫав этем ачана пӗрмаях хӗнесе пурӑннӑ. Арҫын, сӑмах май каласан, опекун шутланнӑ. Халӗ арҫын ачана вӑл ҫемьерен туртса илнӗ, вӑл урӑх опекунпа пурӑнать. Ҫул ҫитменнисемпе ӗҫлекен комиссипе подразделение те пӑтӑрмах пирки пӗлтернӗ.
Следстви комитечӗн Чӑваш Енри управленийӗн пресс-службинче пӗлтернӗ тӑрӑх, халӗ тӗпчев малалла пырать. Ун вӑхӑтӗнче суд экспертизисем туса ирттермелле, кӳнтеленсемпе калаҫмалла.
Канаш округӗнчи Вӑтакас Татмӑш ялӗнчи культура ҫуртӗнче хӑйне евӗр социокультура проекчӗ «Туслӑх кӗперӗ» старт илнӗ. Виҫӗ Татмӑшра пурӑнакансем ялсене пӗрлештерме шухӑшланӑ. Татмӑш ялӗсем Элӗк, Канаш тата Патӑрьел округӗсенче пур.
Хӑнасене чӑваш йӑли-йӗркипе – ҫӑкӑр-тӑварпа тата юрӑ-ташӑпа – кӗтсе илнӗ. Фойере ал ӗҫӗсен ӑстисен куравне йӗркеленӗ.
Малтан сцена ҫине хӑнасене йышӑннӑ Татмӑшсем, «Татмӑш ен» фольклор ансамлӗ, тухнӑ. Истори ӑслӑлӑхӗсен кандидачӗ Людмила Пантелеймонова Чӑваш Енре Татмӑш ялӗсем мӗнле пулса кайни пирки каласа кӑтартнӑ.
Хӑнасем пурте пӗрле «Тӑвансем, пӗрле юрлар-ха» юрра шӑрантарнӑ. Юлашкинчен пухӑннисене пурне те шӳрпепе хӑналанӑ.
Ют ҫӗршыври ултавҫӑсем ҫынсене телефонпа темле майпа та улталаса укҫасӑр, хваттерсӗр хӑварнине пӗлетпӗр-ха. Маларах тӗрмери ҫынсем те ҫавӑн пек шӑнкӑравлаҫҫӗ тетчӗҫ. Анчах хамӑр патрисемех улталаса ҫӳрени тата та ытларах тӗлӗнтерет пек туйӑнать.
Акӑ, Элӗк районӗнчи пӗр арҫын карчӑк-кӗрчӗке улталаса пурӑннӑ. 33 ҫулти вӑйпитти Елчӗк районӗнче пурӑнакан ватӑсене улталаса ҫӳренӗ.
Социаллӑ ӗҫчен тесе вӑл ватӑсене пӗчӗк парнесем валеҫсе ҫӳренӗ, унтан налук тесе 20-шер пин тенкӗ ыйтнӑ.
Ҫапла майпа вӑл пилӗк кинемее улталама хӑюлӑх ҫитернӗ, вӗсенчен 97 пин тенкӗ ыйтса илнӗ.
Ҫынна суйма именмен, Турӑран та хӑраман, ватӑсене сума сума пӗлмен намӑссӑра ҫывӑх вӑхӑтра Елчӗкре суд тенкелӗ ҫине лартӗҫ.
Элӗк округӗнчи Этмен выҫҫӑлккинче пысӑк инкек пулнӑ. Унта икӗ хӗрарӑм юр айне пулса вилнӗ.
Чӑваш Республикин прокуратури малтанлӑха палӑртнӑ тӑрӑх, вӗсем пӳрт тӑрринчен юр антарнӑ вӑхӑтра юр йӑтӑнса аннӑ. Шӑпах вӗсем ҫине ӳкнӗ. Иккӗшӗ те ҫавӑнтах вилнӗ.
Халӗ йӗрке хуралҫисем ӗҫ-пуҫа уҫӑмлатас тесе ӗҫлеҫҫӗ. Прокуратура следстви умӗнхи тӗрӗслеве сӑнаса тӑрӗ.
Элӗк округӗнче Эренар ялӗнче пушар машини вырӑна ҫитеймен. Ку – ҫула юртан тасатманнипе.
Инкек нарӑсӑн 23-мӗшӗнче каҫхине пулнӑ. Пӗр хуҫалӑхра мунча ҫунма тытӑннӑ. Пушарнӑйсем сӳнтерме васканӑ, анчах машина юр ӑшне кӗрсе ларнӑ. Пушарнӑйсен ҫунакан мунча патне ҫити шланг тӑсма тивнӗ.
Ял ҫыннисем каланӑ тӑрӑх, вӗсем ҫула тасатма пӗрре мар ыйтнӑ. Анчах пӗр хурав пулнӑ: транспорт пушӑ мар,май пулсанах тасатма килессе шантарнӑ. Мунча ҫуннӑ хыҫҫӑн вара ҫула ҫур ҫӗр иртни 2 сехетре хырса кайнӑ.
Шупашкарта Виталий Сергеев профессора асра тытса нарӑс уйӑхӗн 5-мӗшӗнче 12 сехетре асӑну хӑми уҫаҫҫӗ. Вӑл хулари Университет урамӗнчи 20-мӗш ҫуртӑн 1-мӗш корпуcӗ ҫинче пулӗ. Митинга хутшӑнас кӑмаллисене хапӑл туса кӗтеҫҫӗ.
Виталий Сергеев — чӗлхе тӗпчевҫи, филологи наукисен докторӗ, профессор, Чӑваш Республикин наукӑн тава тивӗҫлӗ ӗҫченӗ, Н.И. Ашмарин ячӗллӗ преми лауреачӗ, Раҫҫейӗн аслӑ пӗлӗвӗн хисеплӗ ӗҫченӗ.
Виталий Иванович 1942 ҫулхи кӑрлачӑн 20-мӗшӗнче Элӗк районӗнчи Мартынкассинче ҫуралнӑ, 2018 ҫулхи юпа уйӑхӗн 16-мӗшӗнче пурнӑҫран уйрӑлса кайнӑ.
Паян Агриппина Янович вӑрҫӑ ветеранӗ пурнӑҫран уйрӑлса кайнӑ. Вӑл 100 ҫулта пулнӑ.
Ҫак йӗркесен авторӗ ун патӗнче ӗҫпе темиҫе те пулнӑччӗ. Иртнӗ кунҫулне туллин те кӑсӑклӑн аса илсе каланипе вӑл асра юлнӑ. Пӗр икӗ-виҫӗ ҫул каялла та ветеран дачӑра ӗҫленӗ, хулари хӑй пурӑнакан нумай хваттерлӗ ҫурт умне чечек лартса пӑхса тӑнӑ.
Агриппина Ивановнӑпа кӑрлач уйӑхӗн 23-мӗшӗнче сывпуллашӗҫ.
+2.3 °C